Tədbirlər

"Triumf" qalereyası müxtəlif ölkələrin müasir rəssamları ilə dialoqu və onların tanıdılmasını təşviq edən "EXTENSION" layihəsinin 10-cu buraxılışını təqdim etdi. “EXTENSION.AZ. Məxməri etiraflar” (“EXTENSION.AZ: Off the Velvet Chest”) sərgisində Azərbaycandan olan 15 rəssamın əsəri yer alır. Kataloqa keçid: https://www.triumph.gallery/media/catalogs/catalog_velvet__1639667044.782629.pdf

Sərgi izləyiciləri Azərbaycanın müasir incəsənətinə 2008-ci ildən bəri xaricdə yaşayan kolleksiyaçı Sədaqət Xəyal-Quşqunun prizmasından və zövqündən baxmağa dəvət edirdi. Vətənə olan nostalji hisslər və müasirlərinə, xüsusən də qadın rəssamlara dəstək olmaq arzusu transmilli neft şirkətinin uğurlu menecerini sənət kolleksiyaçısına çevirdi. Sədaqət xanım sərginin kuratoru Əsli Səmədova və "Triumf" qalereyası ilə birlikdə öz kolleksiyasındakı ən vacib nümunələri Moskvada və Rusiyanın bir neçə başqa şəhərində nümayiş etdirmək üçün seçmişdir.

Sədaqət Xəyal-Quşqunun kolleksiyasının əsası Maral Rəhmanzadənin kiçik akvarel mənzərəsi ilə qoyulmuşdur. Gələcək kolleksiyaçıya bu əsər 2008-ci ildə xaricə köçməzdən əvvəl bir vida hədiyyəsi kimi verilmişdi. Bu iş onun Azərbaycandakı keçmiş evi haqqında daimi bir xatırlamaya çevrilmiş və kolleksiyaçının qadın rəssamlara olan marağını müəyyən etmişdir. O, tədricən öz kolleksiyasını Azərbaycanın keçmişini, bu gününü və gələcəyini əks etdirən vizual bir gündəliyə çevirmişdir.

İrina Eldarovanın “Qızlar neftçilərə üstünlük verir” (Girls Prefer Oilmen) rəsmi və Orxan Hüseynovun “Atelier Sovetski” adlı 8 kanallı video-instalyasiyası kosmopolitlərin və romantiklərin səmimi cənub şəhəri olan köhnə Bakının immersiv təəssüratını yaradır. Aydan Salahova və Zərnişan Yusif əsərlərində əsl şərq ismətini nümayiş etdirir, neo-oriental həssaslığa və seksuallığa qadın baxışını incə eyhamlarla üzə çıxarırlar.

​

Onların sakit və zərif vizual dili Niyaz Nəcəfovun cilovlanmaz enerji ilə dolu, vazadakı güllər mövzusundakı müxtəlif forma və interpretasiyaları ilə valeh edən rəsmləri ilə qarşı-qarşıya qoyulur (yuxstapozisiya). Azərbaycan xalçaçılıq ənənəsinə konseptual yanaşması ilə tanınan Faiq Əhməd “Sosial anatomiya” (Social Anatomy) adlı monumental videosunu təqdim edir. Bu video ənənəvi Qafqaz mədəniyyətinin mühüm mərhələlərini — doğuluş, yetkinlik, toy və dəfni əhatə edir. Sənədli-uydurma (mockumentary) janrı və folklor estetikası sərgidə bir-biri ilə dialoqa girən Fərhad Fərzəliyev və Tora Ağabəyovanın əsərlərinə təsir göstərmişdir. Aqil Abdullayevin “Xəzər bədənlərinin uca siqnalı II” (Loud Sirens of The Caspian Bodies II) foto-layihəsi onun cəmiyyət, gender və seksuallıq arasındakı münasibətlərə olan marağından qaynaqlanır. Bu mövzular həmçinin performans ustası Vüsal Rəhimin ana obrazında çıxış etdiyi “Mənim daxilimdə” (Inside Me) videosunda da işıqlandırılır. Səmimiyyət və dünyanın parlaq dərki gənc rəssam Mədinə Qasımovanın fərqləndirici xüsusiyyətləridir. Kolleksiyada paytaxt rəssamları ilə yanaşı, regionlardan olan və əvvəllər Azərbaycandan kənarda nümayiş olunmayan qadın rəssamların — Sürəyya Muğanlı və Məhəbbət Kazımovanın da əsərləri yer alır.

Şəxsi kolleksiyanın təqdimatı olan “Məxməri etiraflar” bizə həm dəyəri az bilinənləri, həm də ən qiymətliləri qoruyub saxlamağın zəruriliyini xatırladır. Sərgi, mahiyyətcə özləri də bir kolleksiyaçı olan rəssamların auditoriya üçün yaratdıqları bir çox obrazları, artefaktları, müşahidələri və funksional hekayələri bir araya gətirir. Texnikaların və yaradıcı yanaşmaların rəngarəngliyi sərgiyə rəssam və kolleksiyaçı arasındakı münasibətləri araşdırmağa və mədəniyyətə fərdi töhfə verməyin vacibliyini bir daha təsdiqləməyə imkan verir.